«Во имя Отца, и Сына, и Святаго Духа Аминь.

Аз грешной старец Зосима, именуемой Захарий,

Свидетельствуя о себе пред самим Богом, написах своеручно во уверение вам, моим духовным сестрам, Онисии, Наталии и Евдокии.

Аще не от всего сердца и души моея о Бозе к вам усердствую дотолико, что даже и в царствие Божие не хощу без вас внити, то да лишен буду онаго во веки.

Второе, аще порочною, то есть нецеломудренною и нечистосердечною люблю вас любовию, то да буду сам возненавиден от Бога.

Третие, аще не дорожу ваше спасение с моим наравне, то да будет низведена во ад душа моя.

Четвертое, аще без благословныя вины восхощу оставити вас или не старатися о потребном и нужном для вас, то от Бога сам оставлен да буду^>23.

Сице равно и мы нижеподписавшияся твои духовныя дщери, во утверждение нашего вечностию связаннаго духовнаго дружелюбия с тобою и между собою, тако глаголем пред самим Богом. Аще которая из нас таковых усерднолюбителных чувств дотолико к тебе духовному нашему отцу или к сестрам не имеет, что даже ниже царствия Божия желати наследити единой без других, или которая из нас аще неоткровенна во всем будет тебе, или не восхощет всегда в повиновении быти у тебе и творити во всем по повелению и совету твоему, или восхощет оставити тебе, или от сестр разлучитися без твоего согласия, тогда таковая яко неистинствующая и отпадшая и поправшая сей завет наш, пред Богом соделанной, да будет изглаждена из него и лишена нашего с нею соуза. И прочее да не числится между нами в нашем единодушном, вечном неразторжном о Христе содружестве, в том и подписуемся. Онисия Конюхова. Наталия Васильева. Евдокия Романова.

Сего ради вообще о нашем завещании ко Господу Богу возвещаем, взывающе сице:

Боже и Господи всех, всякаго дыхания и души имый власть! Веси яко со упованием на Тя, и с намерением во благоугождение Тебе, тако сложилися во единодушное и вечностию неразрушимое содружество. Сего ради единодушно молим Тя: не посрами нас Боже! тако дружелюбне о имени Твоем сложившихся, но даждь нам в сходство завета нашего и по смерти нашей неразлучными быти един от другаго. Понеже уповая на Твою благостыню, милующую нас, связахом самих себя таковым завещанием и обещанием. Дондеже не узрим всех нас четырех Твоею благостию и милосердием прощенных и помилованных, то единому без других не желати наследити вечное небесное блаженство, ниже внити во оное покоище, яже ты Господи уготовал еси любящим и послужившим Тебе.

Во утверждение же сего нашего о Бозе духовнаго завета и о непреложности нашей, и по смерти таковыми обрестися друг ко другу, своеручно подписуемся:

Аз грешной старец и друг ваш духовной, паче же недостойной раб ваш именем Захарий, зовомой Зосима, тако пред самим Богом безначальным Отцем, и собезначальным Его Единородным Сыном, и пресвятым и животворящим Духом завещаю самаго себе и обещаюся от души моея, аще вы таковыми, якоже ныне со мною и между собою в дружелюбии имеетеся и такожде как ныне покорны и послушны мне будете всегда и во всем, чистосердечно в точности откровенны, то аще сице пребудите во всю вашу жизнь, то ежели от Бога помилован буду и сподоблюся участи угодивших Богу, тогда, ежели Бог бла[го] волит, непременно по сему завещанию поступлю и выполню. То есть: молити буду Бога, да первее вас сподобит вечнаго блаженства, а потом да причтет и мене к вам.

Такожде и я дочь твоя духовная Онисия, таковое обещание даю пред Богом. Если ты, отче, и сестры с таковым духовным о Христе дружелюбием, якоже зде изображено, пребудите ко мне и между собою навсегда, то аще от Бога помилована буду и сподобаюся причтена быти ко святым угодившим Богу, тогда аще благоволит Бог, то не иначе, но тако, якоже ты, отче, о себе изъявил, сице и я поступлю и выполню.