«Аще же кто не приемлет покорити себя воли Божией, тому по истинне лучше не касатися монашества, нежели со своеумием и презорством жити между святою братиею. Понеже яко же от беса, тако от самочинного и не следующего по преданию происходят всему братству соблазны, молва и смущение».
«Святый Григорий Синаит глаголет: „Малая и великая и сокращенная повинующихся лествица пять имать степеней, к совершенству ведующих: первый – отвержение, второй – повиновение, третий – послушание, четвертый – смирение, пятый – Божественная любы, яже есть Бог. Несть иного кратчайшего пути к вышним чертогам, малою лествицею добродетелей ведущего, якоже умерoвления пяти послушанию сопротивляющихся страстей: преслушания, глаголю, и прекословия, самоугодия же и оправдания, и пагубного мнения“».
«Аще не творим должнаго иночеству и не тщимся о исполнении наших обязанностей, то како благодать Божия излиется на нас? Подобне тем, иже не хощут трудитися в земледелании, како возмогут собирати плоды? Мы же к тому аще и исполнили бы все внешнее: то есть нищету, уединение, воздержание, бдение, продолжительное моление, поклоны, долгое поучение Святаго Писания, последность и тому подобное – но вся таковая суть токмо орудия. Истиннаго же и спасительнаго плода пусты окажемся, аще к тому не стяжем богоугодных добродетелей, сие есть: совершеннаго самоотвержения, истиннаго смирения, мира и согласия, духовнаго радования о Бозе и о ближних, умнаго блюдения, чистоты сердечныя, простодушия, милости, сострадания, кротости, долготерпения, безгневия и Богоподражательной любви. Сими токмо добродетельми душа усвоивается Богу. Однако же преблагий и человеколюбивый Господь, видя труд и подвиг наш во внешних делах, дарует нам своею благодатию и сии плоды духовные. А потому долженствуем неослабно трудитися и тщатися творити то, что от нас зависит. Бог же милостию Своею, яко благосерд, облагодатствует и наши души, и возрастит в нас плоды духовные».
«Вступая в монашество, прежде всего предаются в руководство, отвергают свою волю и дают обещание сохранять повиновение и послушание безразсудно. Творят же сие не для иной цели, токмо еже бы достигнуть чистоты душевной и безстрастия, ибо без сего и иночество не поможет нам, паче же всуе и на осуждение будем носить на себе наименование монашеское: аще не потщимся делами исправить и оправдать оное. Дела же и исправление иноческое состоит в истинном отвержении всех своих прихотей, желаний, наклонностей, пороков и страстей, дабы все то, что прежде было нам вожделенно, дорого и любимо, Бога ради презреть, попрать, и в конец отринуть свою волю, свое мудрование, самомнение и самолюбие: отнюдь ни к чесому земному не прилеплятися».
«Вступивше во иночество, подобает слушати и внимати наставлениям, во всем покарятися, нигде ни в чем своего хотения не приискивать, нраву, воле и желанию своему отнюдь не внимать».
«Понеже поступившему в житие иноческое и предавшемуся в повиновение, по правилам иноческим долженствует и жити, а не по подобию светских людей, – жизнь иноческая есть духовная, – то и подобает токмо о духовном богатстве пещися; духовное же богатство внутрь нас имеется по гласу Господню: Царствие Небесное внутрь вас есть. И так егда обретем неложное иноческое богатство, то есть восчувствуем в себе кротость, смиренномудрие, безгневие, терпение, милосердие, упование не на временное нечто, но на Бога живаго, радование внутреннее о Бозе и веру непоколебиму, простосердечие, сострадание и любовь чистую ко всем и прочие плоды духовные, тогда и сами светло познаем внутрь нас наше богатство и духовное сокровище, и со извещением возчувствуем свое спасение».