Ойуунускай төбөтүн тоҥхотто. Бу түгэҥҥэ тула турар дьон бүтүннүү кинини кытта бииргэ сүһүөхтээх бэйэлэрэ сүгүрүйэн, хоолдьуктаах бэйэлэрэ хоҥкуйан турдулар.

– Бу сытаахтыыллар сахалаах нуучча уолаттара барахсаттар. Убай-быраат кэриэтэ сэргэстэһэн, – Ревком бэрэссэдээтэлэ эмискэ көнө түстэ. – Кэбис, “кэриэтэ” диэн этэр сыыһа. Кинилэр чахчы бырааттыылар. Төһө да биир ийэттэн-аҕаттан төрөөбөтөхтөрүн, тус-туспа омук ыччаттара буолбуттарын иһин, кинилэр идея, өй-санаа, охсуһуу өттүнэн дьиҥнээх бырааттыылар. Ол ханнык баҕарар эт-хаан бырааттыылааҕар ордук бигэ, ордук эрэллээх бырааттаһыы. Бу бары норуоттар баттаммыттара өрөбөлүссүөннэй кыргыһыы уотугар уһаарыллыбыт бырааттаһыылара, кинилэр үгүс ньургун уолаттарын, кыргыттарын кыа хааннарынан ситиһиллибит доҕордоһуулара туохха даҕаны хотторуон сатаммат! Халыҥ хаһалаахтар, суон сааллаахтар, төһө даҕаны кыыллыйдаллар, өрөгөйдөөх Өктөөп өрөбөлүүссүйэтиттэн көҥүлүн туппут, автономиятын бэлэхтэппит саха норуотун хаһан даҕаны эргэ батталлаах олоххо төттөрү эргилиннэриэхтэрэ суоҕа! Саха сиригэр сэбиэскэй былаас үйэттэн-үйэ тухары үүнэ-күүһүрэ, торолуйа-туругура туруо!.. Быралыйар бырастыы буоллун…

Араатар тиһэх тылларын оркестр сыналҕана сапта…

Ойуунускайы үрдүк уҥуохтаах, модьу-таҕа көрүҥнээх байыаннай, Саха сирин сэриилэрин командующайа солбуйда. “Байкалов… Байкалов… Карл Карлович…” – диэн сибигинэһии дьон кэккэлэрин саба сүүрдэ. Байкалов өссө 1905 сыллааҕы нуучча бастакы революциятыгар кыттыбыт кырдьаҕас хомуньуус үһү. Омугунан латыш. Урукку араспаанньата Некундэ диэн эбит. Кини Сибииргэ Колчак армияларын утары кыргыһыыларга аатыран ити билиҥҥи араспаанньатын ылыммыт диэн кэпсииллэр…

Байкалов байыаннай маҥан бараан сонун кириэстии түспүт саппыйаан курдар халыҥ таһаатын синньэтэн, нүксүгүр соҕус уҥуоҕун көннөрөн көрдөрөллөр. Кини бөдөҥ сурааһыннардаах үрдүк муруннаах, кэтит сүүстээх улахан төбөтө мрамор таастан кыһыллан оҥоһуллубукка дылы.

Командующай Кыһыл Армия урут урусхаллаабыт үрүҥ генерала Пепеляев, эмиэ сэрии хомунан, омук империалистарыттан көмөлөһүннэрэн, илин Аянтан Саха сирин диэки салаллан иһэрин туһунан эттэ.

– Биһигини иннибитигэр кырыктаах охсуһуу күүтэр. Бу охсуһуу бастакы сиэртибэлэрин – күндү бойобуой доҕотторбутун кытта бүгүн биһиги быраһаайдаһабыт, – командующай тимири тимиргэ охсон эрэрдии кытаанах чаҕаан куолаһа тымныы салгыҥҥа сатарда. – Бу кутурҕаннаах мүнүүтэҕэ кинилэр аһаҕас хоруоптарын иннигэр туран андаҕайабыт: Саха сиригэр сэбиэскэй былааһы самнары үктээн, кыһыл Россияны кыайаары иһэр Пепеляев генерал суолугар биһиги, Кыһыл Армия байыастара, саха норуотун кытта бииргэ илии илииттэн ылсыһан, сарын сарынтан даҕайсан, тулхадыйбат ньыгыл таас хайа буолан туруохпут! Үрүҥнэр сэриилэрин үнтү сынньыахпыт! Ол туһугар биһиги, өлбүт доҕотторбут курдук, олохпутун даҕаны биэрэрбитин кэрэйиэхпит суоҕа! Андаҕайабыт!..

– Андаҕайабыт!.. Андаҕайабыт!.. Андаҕайабыт!.. – сүүһүнэн ыстаал ыстыык өрө кыырайда.

Ити кэнниттэн тылы Россия Коммунистическай (большевик) партиятын обкомун секретара Максим Кирович Аммосов ылла. Бу киэҥ эрилкэй харахтаах, сэргэх, сырдык сирэйдээх, эрчимнээх, сытыы туттуулаах, намыһах соҕус, бэйэтигэр сөрү-сөп эттээх-сииннээх киһи, көрө түстэххэ, хайдах эрэ эдэр хотойу санатара. Бу билигин даҕаны, төһө да ыар кутурҕаны көхсүгэр сүгэн турдар, кини тыл этээри, уҥуоргу мырааны одуулуурдуу күөрэччи туттубут төбөтүттэн чигдигэ бигэтик тирэммит хаатыҥкатын тумсугар тиийэ – бүтүн бэйэтэ бүтүннүүтэ уоттаах охсуһуу төлөнүнэн, кэнэҕэски кыайыы сардаҥатынан куустаран турарга дылы. Аммосовтаах Ойуунускай саха дьадаҥылара саамай киэн туттар, ытыктыыр, таптыыр дьонноро этилэр. Кинилэр ааттара саха дьонун сүрэҕэр “сэбиэскэй”, “бассабыык”, “хомуньуус” диэн тыллары кытта дьүөрэлэһэн киирэрэ. Кинилэр ааттара ити тыллардыын биир өйдөбүллээх курдуктара.