– Нат, ёй лэс на перегэя и пыя.

Лыя карандашо скаминдэстыр, и посыкадя штэто прэ патрин. Тимофеё Ильичё вырискирдя вастэндыр карандашо.

– Ада нанэ саро. Адай исы межёво столбо. Полосато.

– Одой и пыя. При свидетелях. Одой электрики линия тырдынэ.

– А карик ёй пыя шэрэса? – спучья председателё.

Ром лыя вавир карандашо, и посыкадя:

– Адарик.

Прэ адава моло ёв уже уридя шляпа:

– Опять же прэ пхув «Труженика».

Ром засандяпэ:

– Должно тэ явэл, туса посоветовалась, карик фэдыр тэ пэрэл.

Тимофеё Ильичё потасадя псикэнца, и протырдыя васт секретарёскэ:

– Дыкхэнте, Ивано Дмитриевичё, кана тумэ сарэса дро курсо.

Нэ секретарё райкома, хай на удыкхтя. Отгэя дро вэнгло, и официальнэс пхэндя:

– Ладжяво, товорищё Ермаков! Дякэ или нат, нэ гандладя рискирэса.

Председателё сыр сыс тэрдо дрэ шляпа, дякэ и бэштя.

– А соса, Ивано Дмитриевичё, амэ ласа виноградоскирэ лозы кэ зима тэ кэрас?

Секретарё розлыджия вастэнца:

– Адава на джином. Хасёна – спучаса тутыр. Если камэс – поракир, может, товарищё согласно ловэнца тэ лэл.

Ром пхэндя:

– Полюбовно саро можно.

Тимофеё Ильичё г’аздыя васта ко болыбэ:

– Ту полэс или нат, бэнгоро чаво, со мэ не могу без акта? Адая грасны мандэ гинэлпэ сыр джиды!

Ром вытырдыя кисыкатыр лыл.

– Акто исы.

Тимофеё Ильичё прогиндя лыл, повеселел:

– Саро правильнэс. Ту действительно грамотно ром. А слынэ цыпа? Бангэ амэнгэ цыпа.

– И цыпа слыям. Рискираса, – пхэндя ром.

Председателё сарэса развеселился:

– Ту ром годявир. Перво моло дасавэс встрениндём. Кана чинава лыл бухгалтероскэ. Лэса палэ бибахталэ гандладя пэскирэ ловэ. И чейно сыс адарик тэ джяс. Ту хулаибнытко ром. Кэ мэ дро заместители джяса? Мангэ заместителё чейно.

– На джява.

– Состыр?

– Дарав, не сработаемся.

– Ада ту напрасно. Мэ нанэ злопамятно. И ту мангэ покамьяпэ. Лачё колхозо. Виноградо. Бравинта ласа тэ кэрас, – и отдыя лыл ваш бухгалтероскэ, засандяпэ:

– Акэ, зоралэс рикир! Балвал вырискирэла.

– Мандэ на вырискирэла.

Секретарё райкома Ивано Дмитриевичё Ерёмин подыкхтя прэ лэндэ и засандяпэ.

Пхури Лущилиха наслаждалась. Ёй подкэдыя ушта, счюдя васта про колын, дыя тэ полэс, со ада цветики, главно – ангил, Клавдия дэла тимин лакирьякирэ осведомлённости. Ёй дужакирлас кэдэ Клавдия посыкавэла любопытство, нэ на урикирдяпэ. Придвинулась кэ ёй кхэтанэ табуреткаса.

– Хай и грамотно дасаво ром, а сави – то придурь исы. Лачятыр должностятыр отпхэндяпэ, и адай же помангьяпэ ковалёса. Состыр амаро гав покамьяпэ лэскэ.

Лущилиха придвинулась ещё пашыдыр кхэтанэ табуреткаса, покосиндяпэ прэ фэнштра, и пхэндя шёпотоса:

– А джинэс, Клава, состыр покамья? Миро племяннико ушундя, сыр ёв роспхэнэлас потом секретарёскэ райкома и председателёскэ, хай кай – то адай лэскирья ромня затасадя немецко танко, кана латхтя лакири могилка. Кана прогэя мимо амари кузня, замко слыно, и чаворэ одорик спрастандынэпэс. Мэ одой и тырэс Ваняс дыкхтём.

Ёй наслаждалась э дёстыр. Реакция сыс дасави, со пхури даже здарандыяпэ.

– Со туса, Клавочка? Пэ тутэ муй нанэ! Одой, пало Доно, комаростыр лихоманка дро дуй счёты можно тэ сухтылэс.

– Нат, ничи, мэ нанэ насвалы. Ту, пхури, лэ дро катухо балычёрэс, и, пожалуйста, уджя.

– Пасёв, миленько, пасёв! А палэ балычёрэс наис. То – то миро папу обрадынэлапэ. …Ах, ту, Дэвэл! – и Лущилиха взмахиндя буг’лэ бая, – А гоно – то мэ, пхури, забистырдём! Ту мангэ, Клавочка, дэса пэскиро?

Клавдия разрешиндя:

– Лэ дро сенцы.

Бельвеляса, кэдэ явья чаво, Клавдия спучья лэс:

– Кай санас? И о гад дро саво – то мазуто.

– Ада нанэ мазуто. Ада амэ чаворэнца помогали нэво ковалёскэ тэ тховэс горно.

– Нанэ палсо тэ джяс одорик, – пхэндя Клавдия.