Ра́дуйся, моля́щихся к тебе́ проше́ния прие́мляй;

ра́дуйся, о всех нас Бо́гу моля́йся.

Ра́дуйся, святы́й Дими́трие, сла́вный великому́чениче и чудотво́рче.

Ви́дяще себе́ безча́дна, благочести́вая роди́теля твоя́ приле́жно моля́ста Бо́га о дарова́нии ча́да. Прие́м же Всевы́шний моли́твы ею́ и, помяну́в ми́лостыни, я́же творя́ста убо́гим, дарова́ им тебе́, блаже́нне. Сего́ р́ади с весе́лием возопи́ста Бо́гу: Аллилу́иа.

Ра́зум Боже́ственный име́я, я́ко отроча́ богодарова́нное, возгнуша́лся еси́ язы́ческия пре́лести, му́дре. Роди́тельское же благоче́стие возлю́бль, доброде́тельми а́ки ле́ствицею от си́лы в си́лу восходя́й, благода́ть Бо́жию приобре́л еси́, ю́же испроси́ получи́ти и нам, почита́ющим тя зва́нии си́ми:

Ра́дуйся, благочести́вым роди́телем моли́твенное прозябе́ние;

ра́дуйся, благоче́стия их насле́дниче.

Ра́дуйся, рожде́нием свои́м возвесели́вый мно́гих;

ра́дуйся, от утро́бы ма́терния благода́тию свы́ше осене́нный.

Ра́дуйся, благоуха́нный кри́не де́вства и нетле́ния;

ра́дуйся, освяще́нный душе́ю же и те́лом;

ра́дуйся, вмести́лище дарова́ний Божиих.

Ра́дуйся, от ю́ности идолослуже́ние презре́вый;

ра́дуйся, и́стинное богопочита́ние да́же до сме́рти возлюби́вый.

Ра́дуйся, я́ко благоче́стием твои́м угоди́л еси́ Христу́;

ра́дуйся, я́ко благода́тию Его мног плод сотвори́л еси́.

Ра́дуйся, святы́й Дими́трие, сл́авный великому́чениче и чудотво́рче.

Си́ла Вы́шняго сотвори́ тя, Дими́трие, хра́бра во бра́нех, враго́м стра́шна, всем лю́дем имени́та. Те́мже и злочести́вый царь Максимиа́н вручи́ тебе́ град Солу́нь, повелева́я, я́ко суему́дрый, гна́ти христиа́ны, пою́щия Бо́гу: Аллилу́иа.

Име́яй благоприя́тную по благоче́стию ре́вность, я́ве пред неве́рными испове́дал еси́ Христа́, прехва́льне, и тех ве́ровати и поклоня́тися Тому́ научи́л еси́, и я́ко вто́рый Па́вел был еси́ солу́няном, с ни́миже вопием ти:

Ра́дуйся, Це́ркви Христо́вой драги́й би́сере;

ра́дуйся, гра́да твоего́ украше́ние.

Ра́дуйся, боже́ственную ре́вность в се́рдцы свое́м носи́вый;

ра́дуйся, мучи́телей кова́рства победи́вый.

Ра́дуйся, и́дольския пре́лести обличи́телю;

ра́дуйся, и́дольское те́рние посеца́яй.

Ра́дуйся, благоче́стия учи́телю;

ра́дуйся, на стези́ спасе́ния настави́телю.

Ра́дуйся, враго́м ви́димым и неви́димым непристу́пне;

ра́дуйся, во́ине Христо́в непобеди́ме.

Ра́дуйся, святы́й Дими́трие, сла́вный великому́чениче и чудотво́рче.

Бу́рею одержи́м помышле́ний зло́бных, нечести́вый царь смяте́ся, уве́дев тя, всече́стне, ве́рнаго бы́ти раба́ Христо́ва, к ве́ре в Того́ приводя́ща и и́долы низлага́юща, солу́нян же науча́юща сла́вити Трисвя́тое и́мя Бо́жие и пе́ти Тому́: Аллилу́иа.

Слы́ша, я́ко ды́шащий на тя, Дими́трие, я́ростию Максимиа́н гряде́т в Солу́нь, моли́твою и поще́нии предугото́вил еси́ себе́ к муче́нию, повелева́я Луппу, ве́рному ти рабу́, вся име́ния твоя́ и бога́тства привре́менная расточи́ти убо́гим. Те́мже, восхваля́юще тя, с любо́вию зовем:

Ра́дуйся, преще́ния мучи́телева не убоя́выйся;

ра́дуйся, да Христа́ приобря́щеши, вся расточи́вый.

Ра́дуйся, су́етную сла́ву ми́ра сего́ во уме́ты вмени́вый;

ра́дуйся, небе́сную сла́ву у Христа́ Бо́га на́шего получи́вый.

Ра́дуйся, я́ко состра́ждеши всем тре́бующим от тебе́ по́мощи;

ра́дуйся, су́щим в ну́ждах ско́рый засту́пниче.

Ра́дуйся, ни́щих обогати́телю;

ра́дуйся, си́рых предста́телю.

Ра́дуйся, убо́гим помо́щниче;

ра́дуйся, а́лчущим пита́телю.

Ра́дуйся, святы́й Дими́трие, сла́вный великому́чениче и чудотво́рче.

Боготе́чней звезде́ уподо́блься, Дими́трие, дерзнове́нно Со́лнце Пра́вды пропове́дал еси́ тмо́ю одержи́мому царю́. В темни́це же им заключе́нный, славосло́вил еси́ в ней, я́ко в черто́зе све́тле, Христа́ Бо́га на́шего, с весе́лием поя́ Тому́: Аллилу́иа.