Молитва на благословение пищи и пития мирянами
Го́споди Иису́се Христе́, Бо́же наш, благослови́ нам пи́щу и питие́ моли́твами Пречи́стыя Твоея́ Ма́тере и всех святы́х Твои́х, я́ко благослове́н еси́ во ве́ки. Ами́нь. (И перекрестить пищу и питие.)
Молитва после вкушения пищи
Благодари́м Тя, Христе́ Бо́же наш, я́ко насы́тил еси́ нас земны́х Твои́х благ; не лиши́ нас и Небе́снаго Твоего́ Ца́рствия, но я́ко посреде́ ученико́в Твои́х прише́л еси́, Спа́се, мир дая́й им, прииди́ к нам и спаси́ нас.
Благодарение за всякое благодеяние Божие
Благода́рни су́ще недосто́йнии раби́ Твои́, Го́споди, о Твои́х вели́ких благодея́ниих, на нас бы́вших, сла́вяще Тя хва́лим, благослови́м, благодари́м, пое́м и велича́ем Твое́ благоутро́бие, и ра́бски любо́вию вопие́м Ти: Благоде́телю Спа́се наш, сла́ва Тебе́.
Твои́х благодея́ний и даро́в ту́не, я́ко раби́ непотре́бнии, сподо́бльшеся, Влады́ко, к Тебе́ усе́рдно притека́юще, благодаре́ние по си́ле прино́сим и Тебе́, я́ко Благоде́теля и Творца́ сла́вяще, вопие́м: сла́ва Тебе́, Бо́же Всеще́дрый.
Сла́ва, и ны́не:
Богоро́дице, христиа́ном Помо́щнице, Твое́ предста́тельство стяжа́вше раби́ Твои́, благода́рно Тебе́ вопие́м: ра́дуйся, Пречи́стая Богоро́дице Де́во, и от всех нас бед Твои́ми моли́твами всегда́ изба́ви, еди́на вско́ре предста́тельствующая.
Об умножении любви и искоренении ненависти и всякой злобы
Сою́зом любве́ апо́столы Твоя́ связа́вый, Христе́, и нас, Твои́х ве́рных рабо́в, к Себе́ тем кре́пко связа́в, твори́ти за́поведи Твоя́ и друг дру́га люби́ти нелицеме́рно сотвори́, моли́твами Богоро́дицы, еди́не Человеколю́бче.
Пла́менем любве́ распали́ к Тебе́ сердца́ на́ша, Христе́ Бо́же, да то́ю разжига́еми, се́рдцем, мы́слию же и душе́ю, и все́ю кре́постию на́шею возлю́бим Тя и и́скренняго своего́, я́ко себе́, и повеле́ния Твоя́ храня́ще, сла́вим Тя, всех благ Да́теля.
О ненавидящих и обидящих нас
О распе́нших Тя моли́выйся, любоду́шне Го́споди, и рабо́м Твои́м о вразе́х моли́тися повеле́вый, ненави́дящих и оби́дящих нас прости́ и от вся́каго зла и лука́вства к братолю́бному и доброде́тельному наста́ви жи́тельству, смире́нно мольбу́ Тебе́ прино́сим; да в согла́сном единомы́слии сла́вим Тя, еди́наго Человеколю́бца.
Якоже первому́ченик Твой Стефа́н о убива́ющих его́ моля́ше Тя, Го́споди, и мы, припа́дающе, мо́лим: ненави́дящих всех и оби́дящих нас прости́, во е́же ни еди́ному от них нас ра́ди поги́бнути, но всем спасти́ся благода́тию Твое́ю, Бо́же всеще́дрый.
Во время бедствия и при нападении врагов
Ско́ро предвари́, пре́жде да́же не порабо́тимся враго́м, ху́лящим Тя и претя́щим нам, Христе́ Бо́же наш: погуби́ Кресто́м Твои́м борю́щия нас, да уразуме́ют, ка́ко мо́жет правосла́вных ве́ра, моли́твами Богоро́дицы, еди́не Человеколю́бче.
Возбра́нный Воево́до и Го́споди, а́да Победи́телю! Яко изба́влься от ве́чныя сме́рти, похва́льная воспису́ю Ти, созда́ние и раб Твой; но я́ко име́яй милосе́рдие неизрече́нное, от вся́ких мя бед свободи́, зову́ща: Иису́се, Сы́не Бо́жий, поми́луй мя.
О путешествующих
Путь и Истина сый, Христе́, спу́тника Ангела Твоего́ рабо́м Твои́м ны́не, я́коже Тови́и иногда́, посли́ сохраня́юща, и невреди́мых, к сла́ве Твое́й, от вся́каго зла во вся́ком благополу́чии соблюда́юща, моли́твами Богоро́дицы, еди́не Человеколю́бче.
Луце́ и Клео́пе во Еммау́с спутеше́ствовавый, Спа́се, сше́ствуй и ны́не рабо́м Твои́м, путеше́ствовати хотя́щим, от вся́каго избавля́я их зла́го обстоя́ния: вся бо Ты, я́ко Человеколю́бец, мо́жеши хотя́й.