«Даждь ми умиление, и злых отчуждение, и совершенное исправление, в страстех телесных ныне погруженному, и удаленному от Тебе, Боже всех Царю, и никакоже надежду имуща, спаси мя блуднаго, многия ради благости, Иисусе всесильне, Спасе душ наших».

«Превозшедши чины ангельския, Всенепорочная, со Ангелы всегда моли Ангелы владычествующаго, и всею тварию, даровати нам прегрешений оставление, и избавитися страстей, и достойны сотворити нас тогда певцы славы Его, и наследники нетленныя пищи».

«Хотех слезами омытимоих прегрешений рукописание, Господи, и прочее живота моего покаянием благоугодити тебе, но враг льстит мя, и борет душу мою: Господи, прежде даже до конца не погибну, спаси мя».

«Кто обуреваем, и притекая ко пристанищу Твоему, Господи, не спасется; или кто недугуя, и припадая ко врачевству Твоему не уврачуется, Содетелю всяческих, и Врачу недужных; Господи, прежде даже до конца не погибну, спаси мя».

«Плачу и сетую горце, смотряя страшное Слова воздаяние, от дел не имый ответа и мала противу вине, окаянный. Темже молюся: прежде даже не постигнет мя конца моего безместное, прежде пожатия смертнаго, прежде суда страшнаго, прежде хотящу ми осуждение прияти, идеже огнь негасимый, и тма кромешняя, идеже червь, и скрежет, и снедает согрешившыя, согрешений ми даруй избавление, Христе мой, и велию милость».

«Законы Твоя и Писания презрев, заповеди Твоя отвергох, окаянный, Боже мой, Содетелю мой, како избегну прочее тамошняго, Спасе, мучения; темже прежде конца моего, Спасе, прощение ми даруй, слез тучу, истинное умиление подая, яко Бог преблагий далече от мене отгоняя полки бесовския, ищущих низвести мя во адову пропасть. Темже молюся Ти, да не руку Твою отымеши от мене всемогущую».

«Увы мне! како омрачихся умом; како удалихся от Тебе, и работах окаянный греху, и сласти плотстей, себе всего страстный издах, жившей во мне страстнем; и ныне ожидаю моего еже от жития исхода, и хотящаго томления быти. Господи преблагий, подаждь ми слезное покаяние, и разрешение безчисленных прегрешений моих. Верно тя молю, подающаго мирови велюю милость».

«Господи, согрешая не престаю, человеколюбия сподобляем не разумею. Одолей моему недоумению, едине Блаже, и помилуй мя».

«Господи, и страха Твоего боюся, и злое творя не престаю: кто на судищи судии не боится; или кто уврачеватися хотя, врача прогневляет якоже аз; долготерпеливе Господи, на немощь мою умилосердися, и помилуй мя».

«Слезы, Спасе, покаяния ми даждь сокрушенною мыслию: яко да отмыю скверну души моея, юже зле окалях, дея неправедная на всяк час, имея на сие молящую, Тебе рождшую, и ангельския лики, и Твое человеколюбие».

«Гряди, о душе! и раскайся о многих гресех, яже соделала ecu в житии, и множеству вышних воинств молися, со воздыханием же и слезами; яко да время подастся тебе покаяния, да не яко неплодная смоковница отслешися во огнь геенский всестрастная».

«Ниедину на земли заповедь Твою сотворих, како явлюся Тебе седящему на престоле, и слово дати, и суд подьяти о всех, яже в ведении, и в неведении, коеждо содеях, Христе мой; темже зову Тебе: Твоих слуг молитвами спаси мя блуднаго».

«Покаяния не стяжах, ниже паки слез: сего ради молю Тя, Христе Боже, прежде конца обратити и дати умиление мне, яко да избавлюся муки».

«Виждь твоя пребеззаконная дела, о душе моя! и почудися, како тя земля носит; како не разседеся; како дивии зверие не снедают тебе; како же и солнце незаходимое сияти тебе не преста; востани, покайся, и возопий ко Господу: согреших Ти, согреших, помилуй мя».

«Яко впадый в разбойники и уязвлен: тако и аз впадох от многих грехов, и уязвлена ми есть душа. К кому прибегну повинный аз; токмо к Тебе благоутробному душам Врачу: излей на мя, Боже, великую Твою милость».