– Сизлар кечасию кундуз менинг одамларим ҳимоясида бўласизлар, пул билан таъминлаш ҳам бизнинг зиммамизда. Ҳозироқ Аёзбийга учранг, сизларга истаганларингча сармоя беради.

– Қўлимиздан келган барча ишларни қиламиз.

– Юртимиз келажаги учун фидойилик қиласизлар деган умиддаман.

– Ишончингиз учун ташаккур Бий ака.

* * *

Шомастбий Чодак хожаларининг вакиллари Бакирхўжа билан Равшанхўжани очиқ чеҳра билан кутиб олди. Оёқлари остига қўй сўйиш удуми меҳмонларга бўлган ҳурмат ифодаси эди.

– Хонадонимизга хуш келибсизлар.

– Хушвақт бўлсинлар.

– Ошна-оғайнилар барчаси соғ-саломатми?

– Оллоҳга шукур, барчалари тақсирга салом йўллашди.

– Саломат бўлишсин.

– Илтимосимиз хусусида, розиликларини олгани келдик.

– Юсуфхўжанинг қизига харидор бўлганларингни эшитдим. Таг-зоти кўрган оила, қиз ниҳоятда кўҳлик. Сизлардек нуфузли одамлар харидор бўлишганини эшитиб розилик билдирдим.

– Қуллуқ, ишончларинг учун миннатдормиз.

– Қуда-андачилик бизларни яқинлаштиради, борди-келди қилишимиз учун баҳона бўлади.

– Тўй баҳонасида биз томонларга борсалар барча улуғларимиз билан яқинроқ танишиб олардилар.

– Маъқул, тўйни биз ҳам шу мақсадда дабдабали ўтказмоқни азм қилдик. Барча улуғларни таклиф қиламиз, тўю-томошани якунлаб келин билан сизлар томонга меҳмон бўламиз.

– Жаноблари ҳам албатта борадилар деган умиддамиз.

– Иншооллоҳ.

* * *

Белгиланган кунда дабдабали тўй ҳам бошланди. Бу тўй баҳонасида Шомастбий теварак-атроф кишиларининг диққат эътиборини ўзига жалб қилиб, анча вақтдан буён етилаётган жараённи бошлаш эди. Жуда қулай фурсат етишган, барча тайёргарлик ишлари тугалланиб Шомастбийнинг ишорасини кутишар, меҳмонлар бирин-кетин кириб келишмоқда. Чодакдан келган меҳмонлар ўн-ўн беш нафардан хонадонларнинг алоҳида безатилган хоналарига таклиф қилинмоқда.

Бугунги тантана ҳар доимгиларидан фарқ қилиб, нимагадир шароб ичишга рухсат берилган. Бундай ғайриоддий жараён албатта ўз таъсирини кўрсатиб, бениҳоя жўшқин тус олган. Даставвал карнай-сурнайга жўр бўлиб дўмбиралар чалина бошлади. Теварак-атрофдан келаётган одамлар оқимидан хонадонлар тўлиб тошиб кетган, лекин чодаклик меҳмонлар тушган хонадонларга бегоналарни киритишмас эди. Вақт ярим кечадан ўтаётган бўлса ҳам базм тинмасдан авж оларди. Қаттиқ қарсиллаган товушдан ҳамма чўчиб кетди. Бу белгилаб қўйилган ишни бошлаш учун берилган шартли ишора эди. Қисқагина сукунатдан кейин карнайлар ғат-ғат қила бошлади. Хунрезлик бошланган эди. Меҳмонлар жойлашган хонадонларга қуролланган йигитлар ёпирилиб кириб, огоҳлантирмай барча меҳмонларни чопиб ташлайвердилар. Гап нимада эканлигини билишга ҳам улгурмаган бечораларнинг бошлари таналаридан жудо бўларди. Ҳеч қанча фурсат ўтмай барча Чодакдан келган кишилар мурдага айланишди.

– Бий ота, барча иш битди. Нима бўйруқ берасиз?

– Битта-яримта одам қочиб кетолмадими?

– Мана бу малъун қочиб кетмоқчи экан, йўл ёқасидан ушлаб олдик.

– Уни ҳам ўлдиринглар.

– Шошилманглар, – деди номаълум киши. – Ўлдиришга улгурасизлар, лекин мени сизларга жуда кўп фойдам тегиши мумкин.

– Хўш нима демоқчисан?

– Меҳмон сифатида кириб келган кишиларни бундай шафқатсизлик билан ўлдиришларингнинг сабаби нима?

– Бу сенинг ишинг эмас.

– Иккимиз ҳам Оллоҳнинг бандаларимиз.

– Шундай қилмасликнинг иложи йўқ эди.

– Мақсадларинг нима?

– Бухоро Амирлигининг зулмидан мутлақо қутулиш.

– Амирликнинг зулми учун нега бизлардан ўч олдиларинг?

– Чунки сизлар унинг зулмини жорий қилиш ижрочилари эдинглар.

– Амирнинг ҳамма ерда ишончли одамлари борлигини биласизларми?

– Биламиз, барчасини қириб ташлаймиз.

– Барчасини билмайсизлар, билолмайсизлар ҳам.

– Хўш нима демоқчисан?