Ты и ныне, в Небесней пребывая светлости, наипаче умножавши любовь твою к нам немощным, в море житейстем различие бедствующим, искушаемым духом злобы и страстьми своими, воюющими на дух.

Сего ради смиренно молим тя, святый отче: по данней тебе от Бога благодати помози нам волю Господню в простоте сердца и смирении творити, искушения же вражия победити и свирепое страстей море изсушити; да тако немокренно прейдем житейскую пучину и предстательством твоим ко Господу сподобимся достигнути обетованного нам Царствия Небеснаго, славяще Безначальную Троицу, Отца и Сына и Святаго Духа, ныне и присно и во веки веков. Аминь.

Еже во плоти житию твоему удивишася ангельстии чини, како с телом к невидимым сплетением изшел еси, приснославне, и уязвил еси демонския полки; отонудуже, Афанасие, Христос тебе воздаде богатыми дарованьми, сего ради, отче, моли спастися душам нашим.

Яко невещественных существ зрителя изрядна и деятельна сказателя всеистинна, взывает тя стадо твое, богоглагольнице: не оскудей, моля о рабех твоих, избавитися напастей и обхождений, вопиющим ти: радуйся, отче Афанасие.

Ублажаем тя, преподобие отче Афанасие, и чтим святую память твою, наставниче монахов и собеседниче Ангелов.

О, предивный страстотерпче и изрядный угодниче Христов, отче наш Афанасие!

Со умилением ныне преклоняем колена сердца нашего и взываем ти: принеси молитву нашу к Милостивому и Всесильному Богу и испроси нам у благости Его вся яже на пользу душам и телесем нашим: веру праву, надежду несумненну, любовь нелицемерну, во искушениих мужество, в злостраданиих терпение, в благочестии преспеяние, да не во зло обратим дары Всеблагаго Бога, но во славу имене Его святаго и в прославление твоего о нас ходатайства.

Церковь же Святую от расколов и ересей сохрани, верныя укрепи, заблудшыя на путь правыя веры обрати: отечество твое сохрани от враг ненаветно и споборай оружию крестоноснаго воинства.

Испроси, угодниче Христов, у Царя царствующих и Господа господствующих благодать и силу и благословение небесное правителем государства нашего и подаждь государству нашему тишину и благоустроение.

Не забудь, чудотворче святый, и святую обитель сию: сохрани и соблюди ю молитвами твоими от всякаго зла. Ей, святче Божий, помяни и всех притекающих ко священней раце твоей, и сподоби их кончину благую улучити и Царствие Небесное унаследити, да прославим дивнаго во святых Своих Бога, покланяемаго в Триех Ипостасех, Емуже подобает всякая слава, честь и держава во веки веков. Аминь.

Блажен еси, отче наш Афанасие, яко верно пожил еси, стоя бодренно за святую православную веру, со умилением присно поя неседальное Пречистей, заповедуя никомуже нарушати правое л авныя веры святыя, пострадав за свидетельство истины даже до смерти. Мы же, чтущие святыню твою, со дерзновением взываем ти: отче наш, преподобномучениче Афанасие, похвало и украшение наше.

Монашескаго жития украшение и мучеников красоту явил житием твоим, Афанасие, и яко солнце пресветлое людям православным возсиял еси. Темже и Христос даром чудес обогати тя; да чтуще пресветлую память твою, зовем: поминай стадо твое молитвами твоими, преподобие.

Благоверным князьям Борису и Глебу молятся во время бедствия и нашествия врагов, об избавлении от междоусобной брани, о покровительстве посевам и о плодородии, об исцелении от болезней, в том числе и болезней ног, о умиротворении враждующих и умягчении злых сердец.