Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́, Богоро́дице, но я́ко иму́щая держа́ву непобеди́мую, от вся́ких нас бед свободи́, да зовéм Ти: ра́дуйся, Невéсто Неневéстная.

Пресла́вная Приснодéво, Ма́ти Христа́ Бо́га, принеси́ на́шу моли́тву Сы́ну Твоéму́ и Бо́гу на́шему, да спасéт Тобо́ю ду́ши на́ша.

Все упова́ние моé на Тя возлага́ю, Ма́ти Бо́жия, сохрани́ мя под кро́вом Твои́м.

Богоро́дице Дéво, не прéзри менé грéшнаго, трéбующа Твоéя́ по́мощи и Твоего́ заступлéния, на Тя́ бо упова́ душа́ моя́, и поми́луй мя.

Упова́ние моé Отéц, прибéжище моé Сын, покро́в мой Дух Святы́й: Тро́ице Свята́я, сла́ва Тебе́. Досто́йно есть я́ко вои́стинну блажи́ти Тя, Богоро́дицу, Присноблажéнную и Пренепоро́чную и Ма́терь Бо́га на́шего. Честнéйшую Херуви́м и сла́внейшую без сравнéния Серафи́м, без истлéния Бо́га Сло́ва ро́ждшую, су́щую Богоро́дицу Тя велича́ем. (Поклон.)

[От Пасхи до Вознесения вместо этой молитвы читается припев и ирмос 9-й песни Пасхального канона:

А́нгел вопия́ше Благода́тней: Чи́стая Дéво, ра́дуйся! И па́ки реку́: ра́дуйся! Твой Сын воскрéсе триднéвен от гро́ба и мéртвыя воздви́гнувый; лю́дие, весели́теся!

Свети́ся, свети́ся, но́вый Иерусали́ме, сла́ва бо Госпо́дня на Тебé возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоéго́.

В двунадесятые праздники читается задостойник праздника.]

Сла́ва, и ны́не: Го́споди, поми́луй. (Трижды.)

Го́споди Иису́се Христé, Сы́не Бо́жий, моли́твами Пречи́стыя Твоея́ Ма́тере, преподо́бных и богоно́сных отéц на́ших и всех святы́х, поми́луй и спаси́ нас, я́ко Благ и Человеколю́бец. Ами́нь.

Когда хочешь возлечь на одр свой, читай следующие молитвы:

Влады́ко Человеколю́бче, не ужéли мне одр сей гроб бу́дет, или́ ещé окая́нную мою́ ду́шу просвети́ши днем? Се ми гроб предлежи́т, се ми смерть предстои́т. Суда́ Твоего́, Го́споди, бою́ся и му́ки безконéчныя, зло́е же творя́ не престаю́: Тебé Го́спода Бо́га моего́ всегда́ прогневля́ю, и Пречи́стую Твою́ Ма́терь, и вся Небéсныя си́лы, и свята́го А́нгела храни́теля моего́. Вем у́бо, Го́споди, я́ко недосто́ин есмь человеколю́бия Твоего́, но досто́ин есмь вся́каго осуждéния и му́ки. Но, Го́споди, или́ хощу́, или́ не хощу́, спаси́ мя. А́ще бо пра́ведника спасéши, ничто́же вéлие; и а́ще чи́стаго поми́луеши, ничто́же ди́вно: досто́йни бо суть ми́лости Твоея́. Но на мне грéшнем удиви́ ми́лость Твою́: о сем яви́ человеколю́бие Твоé, да не одолéет моя́ зло́ба Твоéй неизглаго́ланней благости и милосéрдию: и я́коже хо́щеши, устро́й о мне вещь.

Просвети́ о́чи мои́, Христé Бо́же, да не когда́ усну́ в смерть, да не когда́ речéт враг мой: укрепи́хся на него́.

Сла́ва: Засту́пник души́ моея́ бу́ди, Бо́же, я́ко посредé хожду́ сетéй мно́гих; изба́ви мя от них и спаси́ мя, Бла́же, я́ко Человеколю́бец.

И ны́не: Пресла́вную Бо́жию Ма́терь, и святы́х А́нгел Святéйшую, немо́лчно воспои́м сéрдцем и усты́, Богоро́дицу сию́ исповéдающе, я́ко вои́стинну ро́ждшую нам Бо́га воплощéнна, и моля́щуюся непреста́нно о душа́х наши́х.

Зна́менуй себя крестом и говори молитву Честно́му Кресту:

Да воскрéснет Бог, и расточа́тся врази́ Его́, и да бежа́т от лица́ Его́ ненави́дящии Его́. Я́ко исчеза́ет дым, да исчéзнут; я́ко та́ет воск от лица́ огня́, та́ко да поги́бнут бéси от лица́ лю́бящих Бо́га и зна́менующихся крéстным зна́мением, и в весéлии глаго́лющих: ра́дуйся, Пречестны́й и Животворя́щий Крéсте Госпо́день, прогоня́яй бéсы си́лою на Тебе́ пропя́таго Го́спода на́шего Иису́са Христа́, во ад сшéдшаго и попра́вшаго си́лу диа́волю, и дарова́вшаго нам Тебé Крест Свой Честны́й на прогна́ние вся́каго супоста́та. О, Пречестны́й и Животворя́щий Крéсте Госпо́день! Помога́й ми со Свято́ю Госпожéю Дéвою Богоро́дицею и со всéми святы́ми во вéки. Ами́нь.