Копылов, дьиибэргээн төбөтүн хамната-хамната, көрүдүөр устун бара турда.

Томмот Кыыча сүппүтүн хайдах даҕаны быһаарыан билбэккэ эрэйдэннэ. Кыыс дойдутугар тахсыбыта кырдьык быһыылаах. Атын барыах сирэ суох. Чэ сөп, буоллун даҕаны. Ол гынан баран кини тоҕо онно тахсар? Оҕолор этэллэринии, баай кыыһа буолан, баайдарга, үрүҥнэргэ тардыһан дуо? Итини туох диэн утарыаххыный? Дойдулаабыт буолла даҕаны, “кырдьык, оннук эбит” диэн, ити этиини кытта сөбүлэһэргэр тиийэҕин. Оччоҕо кини Кыыча туһунан санаата барыта сымыйа, Кыыча быйыл, былырыын киниэхэ эппитэ, саҥарбыта барыта албын, кубулунуу буоларыгар тахсар. Оччоҕо Кыыча дьиҥнээх дьүһүнүн кистэнэн сылдьар үөн, тыҥыраҕын кумуна туттубут кыыл, доҕор буолан кубулуммут өһүөннээх өстөөх эбит дии! Тугун сүрэй… Баҕарбатаҕыҥ даҕаны иһин, итиннигэр тахсар. Үөрэҕин быраҕан үрүҥнэргэ күрээбит баай кыыһын атыннык хайдах ааттыаххыный?

Ити аата оҕолор Кыычаны комсомолга киирэ сатаабытын сөпкө үүрбүттэр. Томмоту “баай кыыһыгар төбөтүн эргиттэрбит”, “кылаассабай сэргэҕин сүтэрбит” диэн сөпкө эппиттэр… Ити өссө кыра. Томмот доҕотторун утары барбыт таҥнарааччы эбит. Кубулуммут өстөөҕү комсомол кэккэтигэр киллэрэ сатаабыт таҥнарааччы. Кинини итинтэн атыннык ааттыахха сатаммат. Ол эрээри…

“Оо, Кыыча, Кыыча, хайдаҕый ити?! Төттөрүтүн этэр биир даҕаны чахчы мэлигир эрээри, мин итини итэҕэйиэхпин баҕарбаппын. Киһи мэлдьитин баҕарарын, сөбүлүүрүн эрэ оҥорор буолбатах быһыылаах. Баҕарбатарбын да, сырайга-харахха анньар чахчыттан ханна барыахпыный, итэҕэйэрбэр тиийэбин. Кыыча, эн эппитиҥ барыта албын, сымыйа эбитэ буолуо дуо ама?”

Ити курдук араастык саныы сатаан, харааччы мунан баран, Томмот сарсыныгар киэһэлик ГПУ-га тиийдэ. Кини тоҕо онно тиийбитин бэйэтэ чопчу билбэт этэ. Үлэтин туһунан кэпсэтиһээри барбыта диэҕи, онно үлэҕэ киирэрин-киирбэтин өссө быһаарына илигэ. Кини бу мунаах-тэнээх кэмигэр аҕа киһи тылын истиэн баҕарбыта. Ити баҕарбыт түгэнигэр Ойуурап, соччо-бачча билэ илик эрээри, биирдэ кэпсэтээт итэҕэйэ, ытыктыы санаабыт Ойуураба өйүгэр көстө түспүтэ. Кини Кыһыл Ыччат уулуссатынааҕы эргэ таас дьиэҕэ, бадаҕа, ол иһин кэлбитэ.

Ойуурап хоһун аанын хатыы турар эбит.

– Аа-а, Чыычаахап! Кэллиҥ дуу? Үчүгэй! – диэтэ кини Томмоту көрөн. – Миэхэ ыксал наадаҥ суох ини? Оччоҕо сарсын сарсыарда кэлээр. Сөп дуо?

Таһырдьа бииргэ таҕыстылар.

– Чэ сарсыҥҥа диэри! – Ойуурап илиитин уунна.

Чыычаахап хамнаабакка турда.

– Кэпсэтэрдээх этим… – Томмот мух-мах буолан ботугураата. – Биир суолу…

– Уһун соҕус кэпсэтии дуу?

– Соччо уһуна суох да…

– Чэ миэхэ барыах. Ычча, бачча тымныыга таһырдьа сэлэһэ туруохпут дуо? Кыбыстыма, кыбыстыма. Ойоҕо, оҕото суох чороҥ соҕотох киһибин.

Бардылар. Хас да уулуссаны, хас да нэлэккэй олбуору быһыта охсон аастылар. Ол тухары Ойуурап барааҥкатын саҕатыгар кыҥначчы соҕус туттан, саҥата суох дьулуруйан истэ. Аппа үрдүгэр баар эргэ уһун субурҕа дьиэҕэ тиийдилэр. Хараҥа көрүдүөрү ааһан, илиилэрин иминэн харбыалаһан, биир хоско киирдилэр. Ойуурап остуолу буккуйбахтаан чүмэчини булан уматта.

– Дьэ сыгынньахтан… Ээ, кэбис, сыгынньахтаныма, – Ойуурап тута көннөрүннэ. – Аатыҥ Томмот дии, бадаҕа? Үчүгэй аат. Ол гынан баран Томмотуҥ да иһин тоҥуоҥ. Дьиэбит дьыбардаах соҕус буолуохтаах, – инньэ диэтэр да бэйэтэ барааҥкатын устан ороҥҥо бырахта. – Биһиги билигин билиитэбитин оттуохпут да, бып-бырылас буолуо. Хата эн ити чаанньыгы ылан, көрүдүөртэн уһааттан уута баһан киллэр.

Кырдьык, өр-өтөр буолбата: билиитэ умайан тигинээтин кытта дьиэ иһэ сылыйан барда. Томмот сонун, бэргэһэтин уһулла. Бу күннэргэ ыар баттык оҥостубут суолун кэпсиэ эбит даҕаны, Ойуураба билиитэ итийэн эрэр муннугун икки илиитинэн быластыы кууһан, тугу эрэ атыны санаан, аттыгар баар ыалдьытын даҕаны умнан, хос хараҥа муннугун одуулаан турда.