Неплодствовати мя неплодными де́лы, всеблаженне, сотвори, добродетелей благоплодие присно приносяща, чадо мя Господне творя, и причастника Божественному Царствию, и святых собору купножителя.

Святый великий Иоанне, Предтече Господень, моли Бога о нас.

Нам, любящим тя и любовию почитающим, и в

Божественном храме твоем ликующим, даждь с небесе разрешение лютых, Предтече Господень, и жития исправление, и прегрешений избавление.

Пресвятая Богородице, спаси нас.

Носиму во утробе Богоматерни, вся носящему манием, поклонился еси, пророче, с Неюже моли смиренней спастися души моей, во многая впа́дающей по вся дни согрешения.

Господи, Иисусе Христе, Боже мой, помилуй мя.

Помилуй мя, едине Спасе мой, яко Милостив еси и Милосерд, и праведных лико́в сотвори мя причастника.

Святый ангеле хранителю мой, моли Бога о мне.

Мыслити ми присно и творити, Господень ангеле, благая и полезная даруй, яко сильна яви в немощи и непорочна.

Слава Отцу, и Сыну, и Святому Духу.

Яко имея дерзновение к Царю Небесному, Того моли, с прочими безплотными, помиловати мя окаяннаго.

И ныне, и присно, и во веки веков, аминь.

Много дерзновение имуще, Дево, к Воплощшемуся из Тебе, преложи мя от уз и разрешение ми подаждь и спасение молитвами Твоими.

Молитва ко Господу Иисусу Христу

Помилуй мя, Боже, помилуй мя.

Владыко Христе Боже, иже страстьми́ Твоими страсти моя исцеливый и язвами Твоими язвы моя уврачевавый, даруй мне, много Тебе прегрешившему, слезы умиления, сраствори моему телу от обоняния Животворящаго Тела Твоего и наслади душу мою Твоею Честно́ю Кровию от горести, еюже мя сопротивник напои́; возвыси мой ум к Тебе, долу поникший, и возведи от пропасти погибели, яко не и́мам покаяния, не и́мам умиления, не и́мам слезы́ уте́шительныя, возводящия чада ко своему наследию. Омрачихся умом в житейских страсте́х, не могу воззрети к Тебе в болезни, не могу согретися слезами, яже к Тебе любве. Но, Владыко Господи Иисусе Христе, сокровище благих, даруй мне покаяние всецелое и сердце люботрудное во взыскание Твое; даруй мне благодать Твою и обнови во мне зраки Твоего образа. Оставих Тя, не остави мене; изыди на взыскание мое, возведи ко пажити Твоей и сопричти мя овца́м избра́ннаго Твоего стада; воспитай мя с ними от злака Божественных Твоих Таинств, молитвами Пречистыя Твоея Матере и всех святых Твоих. Аминь.

Молитва ко Пресвятой Богородице

Пресвятая Богородице, спаси нас.

Царице моя преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице; зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту, яко волиши; яко не имам иныя помощи разве Тебе, ни иныя предстательницы, ни благия уте́шительницы, токмо Тебе, о, Богомати, яко да сохраниши мя и покрыеши во веки веков. Аминь.

Молитва Предтече Господню Иоанну

Святый великий Иоанне, Предтече Господень, моли Бога о нас.

Крестителю Христов, проповедниче покаяния, кающагося не пре́зри мене, но совокупляяся с вои небесными, молися ко Владыце за мене недостойнаго, унылаго, немощна́го и печальнаго, во многия беды́ впадшаго, утружденнаго бурными помыслы ума моего; аз бо есмь вертеп злых дел, отнюд не имеяй конца греховному обычаю, пригвожден бо есть ум мой земным веще́м; что сотворю; не вем. И к кому прибегну, да спасена будет душа моя. Токмо к тебе, святый Иоанне, благодати тезоимените, яко тя пред Господем по Богородице вем больша быти рожденных всех, ибо ты сподобился еси коснутися верху́ Царя Христа, вземлющаго грехи мiра, агнца Божия; егоже моли за грешную мою душу, да поне от ныне, в первыйнадесять час, понесу тяготу́ благую и прииму мзду с последними. Ей, Крестителю Христов, честны́й Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов; тя молю, к тебе прибегаю. Не отрини мене от твоего заступления, но возстави мя падшагося многими грехи; обнови душу мою покаянием, яко вторым крещением, понеже обоего́ начальник еси: крещением омываяй прародительный грех, покаянием же очищаяй коегождо дело скверно; очисти мя грехами оскверненнаго, и пону́ди внити, а́може ничтоже скверно входит, во Царствие Небесное. Аминь.