Моли Человеколюбца Бога ты, хранителю мой, и не остави мене, но присно в мире житие мое соблюди и подаждь ми спасение необоримое.

Святый ангеле хранителю мой, моли Бога о мне.

Яко заступника и хранителя животу моему прием тя от Бога, ангеле, молю тя, святый, от всяких мя бед свободи.

Слава Отцу, и Сыну, и Святому Духу.

Мою скверность твоею святынею очисти, хранителю мой, и от части шуия да отлучен буду молитвами твоими и причастник славы явлюся.

И ныне, и присно, и во веки веков, аминь.

Недоумение предлежит ми от обышедших мя зол, Пречистая, но избави мя от них скоро, к Тебе бо единей прибегох.

Песнь 5

Ирмо́с: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Помилуй мя, Боже, помилуй мя.

Воспомяни, окаянный человече, како лжам, клевета́м, разбою, немощем, лютым звере́м, грехов ради, порабощен еси; душе моя грешная, того ли восхотела еси.

Помилуй мя, Боже, помилуй мя.

Трепещут ми уди, всеми бо сотворих вину: очима взираяй, ушима слышай, язы́ком злая глаголяй, всего себе геенне предаяй; душе моя грешная, сего ли восхотела еси.

Помилуй мя, Боже, помилуй мя.

Блудника и разбойника кающася приял еси, Спасе; аз же един леностию греховною отягчихся и злым дело́м порабо́тихся; душе моя грешная, сего ли восхотела еси.

Пресвятая Богородице, спаси нас.

Дивная и скорая помощнице всем человеком, Мати Божия, помози мне недостойному, душа бо моя грешная того восхоте.

Пресвятая Богородице, спаси нас.

Исполни, Чистая, веселия сердце мое, Твою нетленную дающи радость, веселия рождшая виновнаго.

Пресвятая Богородице, спаси нас.

Избави нас от бед, Богородице Чистая, вечное рождши избавление и мир, всяк ум преимущий.

Пресвятая Богородице, спаси нас.

Разреши мглу прегрешений моих, Богоневесто, просвещением Твоея светлости, Свет рождшая Божественный и Превечный.

Пресвятая Богородице, спаси нас.

Исцели, Чистая, души моея неможение, посещения Твоего сподобльши, и здравие молитвами Твоими подаждь ми.

Святый великий Иоанне, Предтече Господень, моли Бога о нас.

В течениих Иорданских струю нетления, Предтече, крестив Христа, моли истекания страстей моих изсушити и потоки сладостныя наследовати, и праведных красная радования.

Святый великий Иоанне, Предтече Господень, моли Бога о нас.

Уже рыдаю, и содрогаюся страхом, и недоумением всегда содержим есмь, помышляя моя соделанная и будущий суд ужасный; Благоутробне Господи, пощади мя, Твоего Крестителя мольбами.

Святый великий Иоанне, Предтече Господень, моли Бога о нас.

Законополагаяй людем спасение, Предтече, в раскаянии прегрешений бывшее, посреде закона и благодати стал еси. Сего ради молим тя: образми́ покаяния нас просвети.

Святый великий Иоанне, Предтече Господень, моли Бога о нас.

Даждь ми время покаяния, унынно прешедшее все иждившему, Благодетелю, имея на сие моля́щаго Тя, Слове, Иоанна великаго Предтечу, и покаяния всемiрнаго проповедника.

Пресвятая Богородице, спаси нас.

Наветы и ловлении льстиваго умертвихся, Владычице Всенепорочная, оживи мя, Яже рождшая живот всех, Богородице, ипостасный, да Тя пою благочестно Всенепорочную.

Святый ангеле хранителю мой, моли Бога о мне.

Яко имея дерзновение к Богу, хранителю мой святый, Сего умоли от оскорбляющих мя зол избавити.

Святый ангеле хранителю мой, моли Бога о мне.

Свете светлый, све́тло просвети душу мою, наставниче мой и хранителю, от Бога данный ми ангеле.

Слава Отцу, и Сыну, и Святому Духу.

Спяща мя зле тягото́ю греховною яко бдяща сохрани, ангеле Божий, и возстави мя на славословие молением твоим.

И ныне, и присно, и во веки веков, аминь.