Акафист Богородице ради иконы Ея «Молебница»
Кондак 1
Избранней от рода человеческого во спасение наше блаженней Отроковице Приснодеве Марии, яко избавльшеся Тобою от злых, похвальная воспоим Богородице. Ты же, яко имущая благодать все прошения наша к Творцу всех приносити и во благих их исполняти, ныне моления наши прими, да зовем Ти:
Радуйся, Всемилостивая Владычице, теплая о нас к Богу Молебнице!
Икос 1
Ангел предстатель с небесе послан бысть рещи Богородице: радуйся, и Матерь Господа и всех Владыки Тя зря, ужасашеся, радость Боговоплощения Ей возвещая. Мы же, подражая ему, зовем к Ней таковая:
Радуйся, молитвенная наша Радосте!
Радуйся, всех зовущих к Богу Сладосте!
Радуйся, благодати Божия Откровение!
Радуйся, молитвы благоприятное кадило!
Радуйся, молитв наших к Богу приношение!
Радуйся, по вере нашей всех прошений исполнение!
Радуйся, Всемилостивая Владычице, теплая о нас к Богу Молебнице!
Кондак 2
Видяща Тя Владычице, яко теплую Молебницу о душах наших, все прошения наша к Богу приносяща и во благо их исполняюща, все вернии радости исполняются, о Тебе Богу поя:
Аллилуйя!
Икос 2
Разум неуразумеваемый разумения ищущи, все вернии в недоразумеваемых обстояниях к помощи Твоея прибегают, о Владычице, через Твое заступление вразумления и помощи Божией просяще, по вере своей исполнение прошений своих улучают. Сего ради вопиют Ти:
Радуйся, о самых скудоумных к Богу верная Просительнице!
Радуйся, всем просящим разума Подательнице!
Радуйся, в в неудоборазумеваемых обстояниях вразумление!
Радуйся, от хитросплетений суетного лживого века сего избавление!
Радуйся, тайны воли Божией верным открывающая!
Радуйся, всех верных по воли Божией жити научающая!
Радуйся, Всемилостивая Владычице, теплая о нас к Богу Молебнице!
Кондак 3
Силою, данною Ти свыше, улучила благодать отирати всякую слезу от лица люте страждущих, от бед их избавляти, все прошения благие к Богу приносити и и во благих их исполняти. Сего ради все спасении Тобою и поют Ти:
Аллилуйя!
Икос 3
Имуще воистину благодать Мати Дево молитися за ны, всем бедам нашим сострадати, все моления и воздыхания слезныя к Тебе прибегающих принимати и прошения наши к Богу возносити. Сего ради, имуще таковую твердую Предстательницу и Молебницу нашу, неумолчно Тя песнословим:
Радуйся, о самых грешных и отверженных Верная к Богу Предстательнице!
Радуйся, о всех нуждах надежная наша Просительнице!
Радуйся, молитвенное наше ограждение!
Радуйся, всех прошений наших к Богу приношение!
Радуйся, всех верных к Богу дерзновение!
Радуйся, во благих желаний наших исполнение!
Радуйся, Всемилостивая Владычице, теплая о нас к Богу Молебнице!
Кондак 4
Бурю внутрь имея помышлений сумнительных, сыны суетного века сего, не ведая силы молитвы Матери Творца всяческих, недоумеют, како вернии к заступлению Твоему прибегают, во всех недоразумениях и обстояниях помощь от Тебя получают, о Тебе Богу рече:
Аллилуйя!
Икос 4
Слыша тебя яко добрую Молебницу, верную к Богу Споручницу и Ходатаицу о нас, недостойных и грешных, все вернии к заступлению Твоему прибегают, чая от Тебя во всех недоумениях вразумление, от всех скорбей избавление и на радость их приложение и во благих прошений своих исполнение от тебя получити. Тако, непреложное упование на ходатайство Твое возложив, каеждый по мере веры своея исполнение прошений своих получает. Сего ради и поем Ти, реша:
Радуйся, непреложное наше упование!
Радуйся, молитвенное наше к Богу дерзновение!
Радуйся, кающихся грешников спасение!